Milan shkëlqen sërish, skuadra e Mourinhos përmbys “Djajtë e Kuq”, fiton dhe Real Madrid

Milan ka regjistruar fitoren e tretë radhazi në kampionat teksa ka mundur Spezian me rezultatin 3-0. Dy golat e Leaos dhe realizimi i Teo Hernandez, i dhanë pikët e plota dhe në përballjen e xhiros së tretë skuadrës kuqezi. Pikë të plota për Milanin, që regjistron fitoren e tretë radhazi pa pësuar gol.

Nuk ka shkuar më shumë se një barazim 1-1 Inter ndaj Lacios. Zikaltrit kaluan të parët në avantazh me Lautaro Martinez, por më pas Milinkoviç-Saviç vendosi ekuilibrin. Të dyja skuadrat e mbyllën ndeshjen me 10 lojtarë, pasi Imoblie fillimisht dhe më pas Sensi u ndëshkuan me karton të kuq.

Inter bën hapin e parë fals dhe pas tre javësh ndodhet në kuotën e 7 pikëve, ndërsa Lacio ka grumbulluar vetëm 4 pikë. 

Në kampionatin Anglez, Tottenhem arriti një fitore të jashtëzakonshme ndaj Manchester United. Edhe pse “djajtë e kuq” shënuan të parët me anë të një 11metërshi që u shndërrua në gol nga Fernandes, skena ishte për gjelat e Murinhos, që shënuan plot 6 herë në portën e De Geas. Ndombele, Son, Kane dhe Aurier ishin autorët te gjelat, që tashmë e 7 pikëve, pas katër javëve.

Në Spanjë Real Madrid ka arritur një tjetër fitore, këtë herë ndaj Levantes. Skuadra e Zinedin Zidane fitoi 2-0 në takimin e së dielës. Vinicius Zhunjor sërish tregon se mund të jetë ylli i ri i “galaktikëve”, pasi goli i parë mbante firmën e tij, ndërsa pak sekonda para fundit të ndeshje Benzema shënoi dhe golin e sigurisë, duke i dhënë Realit fitoren e tretë radhazi.