Ministri i Jashtëm iranian: Negociatat me SHBA-në nuk janë të mundshme nëse…

Ndërsa Uashingtoni zyrtar pret përgjigjen e Teheranit ndaj ftesës për të negociuar një marrëveshje të re bërthamore, Ministri i Jashtëm iranian Abbas Araqchi tha se negociatat me Shtetet e Bashkuara nuk janë më të mundshme nëse disa gjëra nuk ndryshojnë, njoftuan sot media shtetërore iraniane.

Teherani mori një letër nga presidenti amerikan Donald Trump këtë muaj duke i dhënë Iranit dy muaj për të vendosur nëse do të hyjë në negociata të reja ose do të përballet me sanksione më të ashpra si pjesë e fushatës së ripërtërirë të Trumpit për “presionin maksimal”, raporton Reuters.

Udhëheqësi suprem fetar i Iranit, Ayatollah Ali Khamenei e hodhi poshtë ofertën për negociata, duke e quajtur atë një mashtrim, dhe ministri i jashtëm i Iranit tha të enjten se Teherani së shpejti do t’i përgjigjet kërcënimeve të Amerikës.

Të dielën, Araqchi tha se Irani nuk është kundër negociatave sepse është “kokëfortë”, por udhëhiqet nga përvoja dhe ngjarjet nga historia e fundit.

Araqchi theksoi se Uashingtoni duhet të rishqyrtojë politikën e tij përpara se të ftojë Teheranin të marrë pjesë në negociata.

Në mandatin e tij të parë si president, Trump tërhoqi Shtetet e Bashkuara nga një marrëveshje midis Iranit dhe fuqive të mëdha që vendosi kufizime të rrepta për aktivitetet bërthamore të Teheranit në këmbim të lehtësimit të sanksioneve.