Ministri i Jashtëm rus i jep ultimatum Ukrainës

Ministri i Jashtëm rus Sergei Lavrov tha të hënën se Ukraina duhet të përmbushë propozimet e Moskës në lidhje me “territoret e tyre të reja” ose ushtria ruse do të ndërmarrë veprime, sipas agjencisë shtetërore ruse të lajmeve TASS.

“Armiku është i vetëdijshëm për propozimet tona për çmilitarizimin dhe denazifikimin e territoreve të kontrolluara nga regjimi dhe eliminimin e kërcënimeve ndaj sigurisë ruse prej andej, duke përfshirë territoret tona të reja (DNR, LNR dhe rajonet Kherson dhe Zaporozhye)”. Lavrov tha, duke përsëritur akuzat e rreme të nazizmit kundër Ukrainës, të përdorura nga Moska në një përpjekje për të justifikuar pushtimin e saj. “Ka mbetur vetëm një gjë për të bërë: t’i përmbushni ato para se të jetë tepër vonë. Përndryshe, ushtria ruse do t’i marrë gjërat në duart e veta.

Rusia pretendoi kontrollin mbi katër rajonet e Luhansk, Donetsk, Zaporizhzhia dhe Kherson pas referendumeve të rreme në shtator, të kritikuara gjerësisht nga Kievi dhe qeveritë perëndimore si shkelje të ligjit ndërkombëtar, shkruan CNN.

Javën e kaluar, presidenti rus Vladimir Putin pranoi se situata në katër territoret e pushtuara ishte “jashtëzakonisht e ndërlikuar”, një dritare e rrallë në sfidat me të cilat përballet Moska në zonat që ka tentuar të aneksojë ilegalisht.

LEXONI GJITHASHTU:

• Rusia mund të sulmojë Moldavinë, zyrtarët: Synon bashkimin me Transnistrinë
• Rusia: Raketat e vjetra amerikane në Ukrainë nuk do të na pengojnë