Ministri i Mbrojtjes i Holandës: Avionët F-35 kanë gjasë të kenë teknologji të pavarur

Ministri i Mbrojtjes i Holandës, Gijs Tuinman, ka lënë të kuptohet se avionët luftarakë F-35 mund të operohen me softuer të pavarur, pa kontrollin ekskluziv të Shteteve të Bashkuara.

Tuinman përdori një metaforë befasuese për të ilustruar këtë mundësi duke thënë se avionët mund të “jailbreak-ohen”, term i njohur nga përdoruesit e pajisjeve elektronike për të anashkaluar kufizimet e softuerit origjinal.

I pyetur nëse Europa mund të ndërmarrë modifikime të tilla pa miratimin e SHBA-s, ministri përgjigjej:
“Nuk është kjo çështja… do të shohim nëse amerikanët do të tregojnë ngjyrat e tyre të vërteta.”

Më tej ai shtoi:
“Do të them diçka që nuk duhet ta them kurrë, por do ta them gjithsesi. Ashtu si iPhone-i juaj, mund ta ‘jailbreak-oni’ një F-35. Nuk do të them më shumë për këtë.”

Komentet e Tuinman reflektojnë shqetësimet dhe debatet në rritje brenda aleancës së NATO-s mbi kontrollin e teknologjisë së avancuar ushtarake dhe pavarësinë strategjike të Evropës, veçanërisht në kontekstin e tensioneve me Rusinë.