Ministri iranian paralajmëron hakmarrje: Do të ushtrojmë të drejtën tonë të vetëmbrojtjes

Ministri i Jashtëm i Iranit, Abbas Araghchi, ka deklaruar se Teherani do të vazhdojë hakmarrjen derisa të ndalet agresioni i SHBA-së dhe Izraelit.

Araghchi i ka dërguar një mesazh sekretarit të përgjithshëm të OKB-së dhe presidentit të Këshillit të Sigurimit, ku thekson se Irani do të ushtrojë menjëherë dhe me vendosmëri “të drejtën e tij të natyrshme për vetëmbrojtje legjitime”.

Ai e cilësoi fushatën ajrore të SHBA-së dhe Izraelit si një “shkelje flagrante” të Kartës së OKB-së dhe një shembull të “agresionit të armatosur” kundër Iranit.

Ministri shtoi se forcat e armatosura iraniane do të përdorin “të gjitha kapacitetet dhe burimet e nevojshme mbrojtëse për t’u përballur me këtë agresion kriminal dhe për të penguar veprimet armiqësore”.