Ministri izraelit bën thirrje për aneksimin e Libanit jugor: Duhet të zgjerojmë kufijtë

Izraeli duhet ta zgjerojë kufirin e tij me Libanin deri në lumin Litani, thellë në jug të vendit, tha të hënën ministri i financave i Izraelit, Bezalel Smotrich, ndërsa trupat izraelite bombarduan ura dhe shkatërruan shtëpi në një sulm ushtarak në rritje.

Komentet e Ministrit të Financave, ishin më të qartat deri më tani nga një zyrtar i lartë izraelit mbi pushtimin e territorit libanez në një luftë që Izraeli thotë se synon militantët e Hezbollahut të mbështetur nga Irani.

Libani u përfshi në luftën rajonale më 2 mars kur Hezbollahu qëlloi me raketa Izraelin.

Që atëherë, Izraeli ka urdhëruar të gjithë banorët të evakuohen në jug të lumit Litani, ndërsa e godet zonën me sulme ajrore, duke e parë atë si një bastion të Hezbollahut, i cili ka vazhduar sulmet me raketa ndaj Izraelit.

Autoritetet libaneze thonë se sulmi ajror dhe tokësor izraelit ka vrarë më shumë se 1,000 njerëz dhe më shumë se një milion janë dëbuar nga shtëpitë e tyre.

Të paktën tre shpërthime u dëgjuan në lagjen Dahiyeh të Bejrutit vonë të hënën, pasi ushtria izraelite tha se kishte sulmuar vendet e Hezbollahut në qytet. Ndërkohë, një sulm i mëparshëm në Bejrut të hënën vrau një komandant të Forcës elitare Quds të Gardës Revolucionare të Iranit, tha ushtria izraelite.