Ministria e Jashtme tregon pse i ndaloi hyrjen në Kosovë Petkoviçit

Ministria e Punëve të Jashtme dhe Diasporës nuk e ka miratuar kërkesën e drejtorit të së ashtuquajturës Zyrë për Kosovën në Qeverinë e Serbisë, Petar Petkoviç, për të hyrë në Kosovë më datën 27 shtator 2022.

Në një komunikatë për media thuhet se mosdhënia e lejes për vizitë, bazohet në mosrespektimin e përsëritur nga ana e Petkoviç të marrëveshjes lidhur me vizitat e ndërsjella të përfaqësuesve politikë, lidhur në Bruksel mes Kosovës dhe Serbisë.

Petkoviç në vazhdimësi është paralajmëruar që gjuha e përdorur nga ai bie ndesh me marrëveshjen dhe që përdorimi i përsëritur i kësaj gjuhe rrjedhimisht çon në refuzimin e kërkesave për të hyrë në territorin e  Kosovës, thuhet tutje në komunikatë.

Qëndrimet e përsëritura të Petkoviç ndaj Republikës së Kosovës kanë karakter tejet dezinformues, propagandues dhe synojnë nxitje të urrejtjes.

Shpresojmë që në të ardhmen Petkoviç të heqë dorë nga deklarata të tilla, të cilat synojnë rrënimin e rendit kushtetues të Republikës së Kosovës, përfundon komunikata.

LEXONI GJITHASHTU:

• Petkoviçit i ndalohet sërish hyrja në Kosovë
• Petkoviç: Nuk e njohim Kosovën, por duhet të mendojmë për serbët në veri