Ministrja e Jashtme e Kosovës përplaset me ambasadoren serbe në RMV

Ministrja e Jashtme e Kosovës, Donika Gërvalla-Schwarz në fjalën e saj në “Forumin e Prespës”, ka thënë që Kosova është lodhur nga dialogu Kosovë-Serbi për vite me radhë dhe ka theksuar se duhet gjetur një zgjidhje, duke prezantuar si të tillë njohjen reciproke midis dy vendeve.

Menjëherë pas kësaj deklarate ka ardhur një replikë nga ambasadorja e Serbisë në Maqedoninë e Veriut, Nevena Jovanovic, e cila në atë moment ka qenë pjesë e publikut.

Meqenëse ministri i Jashtëm serb nuk ishte prezent, ambasadorja ka marrë fjalën, dhe në emër të qeverisë serbe është shprehur se Serbia nuk mendon për njohje reciproke, por për lehtësimin e marrëdhënieve midis Prishtinës dhe Beogradit. Sipas saj, njohja reciproke nuk është në tavolinën e dialogut në Bruksel.

I dërguari special i Shteteve të Bashkuara të Amerikës për Ballkanin Perëndimor, Matthew Palmer, gjatë pjesëmarrjes në panelin e ministrave të Jashtëm të rajonit në këtë forum theksoi se SHBA-të sigurojnë mbështetje të plotë për dialogun Kosovë-Serbi.

Mathew Palmer shtoi se Brukseli dhe i dërguari special i Bashkimit Evropian, Miroslav Lajçak, kanë gjithashtu mbështetjen e plotë të SHBA-ve për dialogun Kosovë-Serbi, për t’i dhënë fund çështjes së Kosovës.

Në forumin e sotëm marrin pjesë edhe presidenti i Maqedonisë së Veriut, Stevo Pendarovski, presidenti i Malit të Zi, presidenti i Sllovenisë, Borut Pahor, kryeministri i Serbisë Ana Brnabic, kryeministri i Kosovës, Albin Kurti dhe kryeministri i Shqipërisë, Edi Rama.

Konferenca, e cila është titulluar ‘Ballkani Perëndimor, Puzzle i munguar për plotësimin e Evropës’, përqendrohet në nëntë tema, përfshirë rolin e BE-së në botë, demokracia evropiane, vlerat, të drejtat, sundimi i ligjit, siguria, migrimi, ndryshimi i klimës, mjedisi dhe shëndeti.

LEXONI GJITHASHTU:

• Fjalimi i Donika Gërvalla në OKB: Serbia të pranojë se do t’i duhet të paguajë çmimin e mizorive të saj
• Vuçiç: Serbia e gatshme për kompromis me Prishtinën, por vendosin njerëzit
• Presidentja e Kosovës këmbëngul që dialogu të përfundojë me njohje reciproke
• Matthew Palmer thotë se liderët e Ballkanit Perëndimor duhet të jenë më konkretë në realizimin e objektivave