Mister rënia e avionit në Kelmend, policia kërkon informacion nga Mali i Zi dhe Kosova

Në avionin sportiv dyvendësh të rrëzuar në zonën e Kelmendit në Malësi të Madhe nuk është gjendur asnjë send i kundërligjshëm, njofton policia.

Autoritetet sqarojnë se pas kqyrjes së mjetit fluturues, i cili ndodhej rreth 800 metër larg kufirit me Malin e Zi, nuk janë gjendur shenja dalluese si: flamur, dokumente të origjinës apo ndonjë dokument tjetër identifikimi.

Sipas policisë, nuk janë identifikuar pilotët dhe nuk janë përcaktuar ende shkaqet e rënies së avionit ngjyrë gri, i cili ka një gjatësi prej 6 metër dhe një gjerësi prej 10.5 metër.

Gazetari Eni Ferhati raporton se është pothuajse e pamundur që avionë të tillë të kapen nga radarët, por efektivët e policisë kanë marrë në pyetje disa banorë të zonë nëse kanë parë diçka të dyshimtë.

Sakaq, policia shqiptare po kërkon informacion nga Mali i Zi dhe Kosova për përcaktimin e itinerarit të fluturimit që ka ndjekur ky avion.

Avioni u rrëzua mesditën e djeshme në zonën e Malësisë së Madhe. Për këtë ngjarje, Kryetari i Bashkisë se Malësisë së Madhe, Tonin Marinaj tha për Euronews Albania se banorët e Kelmendit iu ofruan ndihmë personave që gjendeshin në avion, por janë refuzuar prej tyre.

LEXONI GJITHASHTU:

• ‘Largohuni, s’kemi nevojë për ndihmë’, kryebashkiaku i Malësisë së Madhe tregon detaje nga rrëzimi i avionit në Kelmend
• Një avion i vogël rrëzohet në Kelmend