Mitsotakis: Greqia dhe Egjipti akord për të ardhmen e manastirit të Shën Katerinës

Greqia dhe Egjipti arritën një marrëveshje mbi të ardhmen e manastirit të Shën Katerinës, një nga vendet më të vjetra të adhurimit të krishterë në botë, i vendosur në Gadishullin Sinai, rrëzë malit Sinai të Egjiptit, tha sot kryeministri grek Kyriakos Mitsotakis.

Mitsotakis theksoi se marrëveshja garanton ruajtjen e karakterit të manastirit përgjithmonë, si dhe ndalimin e çdo konvertimi të manastireve dhe vendeve të tjera fetare, raportoi Reuters.

Marrëdhëniet midis Athinës dhe Kajros u përkeqësuan pasi një gjykatë egjiptiane vendosi në maj se manastiri i shekullit të 6-të, i vendosur në tokë shtetërore, ka të drejtë të përdorë vetëm tokën në të cilën ndodhet, si dhe vendet arkeologjike dhe fetare përreth.

Pas negociatave, të dy vendet finalizuan një marrëveshje jashtëgjyqësore, e cila do të nënshkruhet nga udhëheqja e manastirit dhe autoritetet egjiptiane.

Manastiri, i cili është nën mbrojtjen e UNESCO-s, është menaxhuar nga Kisha Ortodokse Greke për shekuj me radhë.

Manastiri i Shën Katerinës është manastiri më i vjetër i krishterë që përdoret ende në funksionin e tij origjinal.

Biblioteka e tij përmban një nga koleksionet më të gjera të dorëshkrimeve të hershme të krishtera.

LEXONI GJITHASHTU:

• Restaurohet manastiri 400-vjeçar në Lunxhëri, rijetësohen artefaktet
• Kuçana flet për një kandidate përballë Manastirliut: Albana Vokshi është më e forta