“Modelja” 106-vjeçare merr vëmendjen botërore, pozon për kopertinën e Vogue

Edicioni filipinas i revistës “Vogue” ka publikuar 106-vjeçaren Apo Whang Od në kopertinën e numrit të muajit prill, duke e bërë artisten e tatuazheve personin më të moshuar në histori që shfaqet në të.

Whang Od, e njohur ndryshe si Maria Oggay, ka perfeksionuar artin e tatuimit me dorë që kur ishte adoleshente, nën mbikëqyrjen e të atit.

Ajo jeton në fshatin malor Buskalan, rreth 15 orë larg nga kryeqyteti Manila, dhe konsiderohet si tatuazhistja më e vjetër e vendit.

Dikur, tatuazhet e stilit “Kalinga” të bëra me dorë apo duke përdorur një gjilpërë bambuje, një gjemb, ujë dhe qymyr, u bëheshin luftëtarëve indigjenë të njohur si “Butbut”.

Ndërsa tani, turistët e huaj që kërkojnë vizatimet e saj gjeometrike përbëjnë pjesën dërrmuese të klientelës së saj.

“E vlerësuar si artistja e fundit e gjeneratës së saj, Apo Wang Od ka gdhendur simbolet e tribusë “Kalinga”, që nënkuptojnë forcë, guxim dhe bukuri, në lëkurën e disa mijëra njerëzve që kanë bërë pelegrinazh në Buskalan”, ka bërë të ditur revista “Vogue” përmes një postimi në rrjetet sociale.

Arti i tatuazhistit në këtë fshat mund t’u kalohet vetëm të afërmve me lidhje gjaku dhe 106-vjeçarja prej disa vitesh ka nisur të stërvisë mbesat e saj Elyang Wigan dhe Grace Palicas.