Monitorimi i zgjedhjeve, 26 vëzhgues të OSBE/ODIHR do të jenë në Shqipëri nga 26 marsi në 17 maj

Misioni i OSBE/ODIHR për vëzhgimin e zgjedhjeve të 25 prillit do të mbërrijë në Shqipëri në 26 mars.

Do të jenë 26 vëzhgues të cilët do të qëndrojnë në Shqipëri deri në 17 maj.

Misioni i vëzhgimit të OSBE/ODIHR ka mbajtur një konferencë për mediat në prag të nisjes së fushatës për zgjedhjet 25 prillit.

Misioni do të udhëhiqet nga Ursula Gacek dhe do të përbëhet nga një grup kryesor prej 12 ekspertësh të bazuar në Tiranë dhe gjithashtu nga 24 ekspertë afatgjatë, të cilët do të fillojnë të shpërndahen në të gjithë vendin duke filluar nga 26 marsi dhe do të jenë prezent deri në datën 17 maj.

Vëzhguesit do të monitorojnë nga afër procesin e regjistrimit të votuesve, aktivitetet në fushatë si dhe punën e administratës së zgjedhjeve dhe trupave të tjera qeveritare, legjislacionit në lidhje me të si dhe zbatueshmërisë. Gjithashtu, misioni do të vëzhgojë dhe mbulimin mediatik të fushatës.

Në këto zgjedhje, për shkak të emergjencës shëndetësore të pandemisë së Covid-19, OSBE nuk do të jetë në gjendje që të ketë vëzhgues me kohë të pjesshme.

Sipas deklaratës së OSBE/ODIHR gjetjet paraprake të vëzhgimit të tyre do të prezantohen një ditë pas zgjedhjeve. Ndërkohë raporti përfundimtar së bashku me rekomandimet do të publikohet 2 muaj pas përfundimit të procesit zgjedhor.