Mot i keq në jug: Ndalohet dalja në det për mjetet lundruese, pezullohet linja Sarandë-Korfuz

Këtë të martë, qyteti i Sarandë është zgjuar nga moti i paqëndrueshëm. Për shkak të erërave me intensitet të lartë dhe dallgëzimit përtej normave të lejuara për lundrim të sigurt, që arrijnë deri në 6 Beaufort, Kapiteneria e Portit Sarandë ka dalë me një njoftim zyrtar.

Sipas njoftimit, është ndaluar dhënia e lejeve dhe çdo dalje në det e mjeteve lundruese, përfshirë mjetet turistike, peshkarexhat dhe skafet e vogla, në të gjithë gjirin dhe zonën bregdetare të Sarandës, Ksamilit dhe Borshit.

Njëherazi, kjo situatë do të vijojë edhe për lëvizjen e tragetit të linjës Sarandë-Korfuz dhe anasjelltas, që nuk do të lëvizin deri në një njoftim të dytë.