Moti i keq dhe ngrica në rrugë, regjistrohen 86 aksidente në 24 orë në Kosovë

Reshjet e borës të rëna me intensitet të lartë kanë shkaktuar probleme edhe në Kosovë. Pavarësisht se rrugët janë të kalueshme, është vështirësuar qarkullimi i automjeteve për shkak të ngricave.

Policia thotë se gjatë 24 orëve të fundit janë regjistruar 86 aksidente, ndërsa një qytetar ka humbur jetën.

Temperaturat minimale priten të variojnë nga 0-1 gradë Celsius, ndërsa maksimalet e ditës parashikohen të shkojnë deri në 6 gradë Celsius.

Autoritetet ftojnë qytetarët të tregojnë kujdes, të respektojnë masat e qarkullimit si dhe të pajisin automjetet me mjete dimërore.