Moti i keq në Elbasan lë 500 banorë pa energji elektrike, dëmtime në rrjetin e shpërndarjes

Mbi 500 abonentë në Qarkun e Elbasanit kanë mbetur pa energji elektrike si pasojë e motit të keq dhe dëmtimeve të regjistruara në rrjetin shpërndarës.

Sipas informacioneve zyrtare, një defekt në Fidrin 2 të Nënstacionit “Përparim” ka sjellë ndërprerje të energjisë për 164 abonentë në zonat Garunje dhe Cacabeze.

Probleme janë evidentuar edhe në zonën e Prrenjasit, ku dëmtimi i shtyllave të tensionit të mesëm, pas përplasjes së një automjeti, ka lënë pa energji elektrike rreth 390 abonentë në Radokal.

Ekipet teknike janë angazhuar në terren për riparimin e dëmtimeve, ndërsa autoritetet bëjnë me dije se puna po vijon me intensitet dhe furnizimi me energji pritet të rikthehet në kohë të shkurtër.

Situata po monitorohet nga strukturat përgjegjëse në bashkëpunim me shtabin e emergjencave, për të garantuar normalizimin e shërbimit dhe sigurinë e qytetarëve.