Muaji mbyllet me temperatura të larta, meteorologu Osmani: Shmangni orët e pikut

Meteorologu i Meteoalb, Hakil Osmani tha për Euronews Albania se java do të nisë me mot të kthjellët, përveç disa reshjeve të pakta në zonat malore.

Temperaturat do të vijojnë të jenë në rritje. Ditën e sotme vlerat maksimale do të arrijnë deri në 36 gradë Celcius, ndërsa pritet që mesi i javës të shënojë temperatura deri në 40 gradë Celcius.

Kjo vlerë termike, siç sqaroi dhe Osmani mund të tejkalohet duke qenë se po afrohen masa ajrore nga veriu i kontinentit afrikan dhe solli në vëmendje shmangien e orëve të pikut, nga ora 11:00 deri në 14:00.

“Këto vlera të larta do të shoqërohen edhe me prezencë të lagështirës duke bërë që të ndihen edhe më shumë vlerat termike gjatë kësaj jave në territorin shqiptar”, – u shpreh meteorologu Osmani, ndërsa theksoi se muaji do të mbyllet me temperatura të larta e kryesisht me mot të kthjellët.

Ndërkaq, Kosova dhe Maqedonia e Veriut do të kenë prezencë të reshjeve por duke nisur nga e mërkura e në vijim në të dy shtetet do të ketë mbizotërim të motit të kthjellët.

LEXONI GJITHASHTU: 

• Parashikimi i motit, kohë e mirë dhe temperatura të larta
• Temperatura deri në 30 gradë, Hakil Osmani tregon si do të jetë moti për fundjavën