“Keni 100 ditë kohë”, kryeministri Rama paralajmëron ristrukturim të policisë së shtetit

Kryeministri Edi Rama i ka dhënë policisë 100 ditë kohë për të ndryshuar në mënyrë rrënjësore efikasitetin e punës së saj në të gjithë territorin.

Ai paralajmëroi se do të ketë lëvizje në të gjithë piramidën e uniformave blu, deri në nivel komisariatesh.

Gjatë një takimi me përfaqësues të policisë së shtetit, kryeministri e cilësoi të pajustifikueshme mungesën e etikës së policisë në raport me qytetarët dhe rastet e shtuara të marrjes së ryshfetet dhe korrupsionin në radhët e uniformave blu. Sipas kreut të qeverisë, një pjesë e tyre duhen zhdukur nga policia e shtetit dhe duhet të dërgohen përpara drejtësisë.

“Patrullat e rendit, forcat ‘Shqiponja’, policia rrugore dhe policia kufitare të hyjnë në një proces shkundjeje shumë të fortë edhe shumë domethënëse brenda për brenda”, tha kreu i qeverisë.

Kryeministri e cilësoi të patolerueshme raste si ai i Sarandës, ku pak kohë më parë, dy persona mbetën të plagosur me armë zjarri në një lokal nate. Sipas tij, në atë rast duhej ndëshkuar i gjithë zinxhiri komandues i policisë, pasi në shkelje flagrante të ligjit kishin lejuar veprimtarinë e atij lokali pas orarit të lejuar.

“Kush janë këta pronarë lokalesh në zonë bregdetare që në mënyrë të hapur shkelin ligjin, tejkalojnë orën policore, krijojnë hapësirë abuzivizmi që degjeneron deri në krisma e plagosje në mes të një dynjaje të tërë që është mbledhur aty. Jua them unë kush janë këta. Janë tutorët e policisë së shtetit në ato territore që bëjnë ligjin, janë korruptuesit, abuzuesit më të mëdhenj me uniformën që tërheqin për hunde shefa komisariatesh e policë, duke i kthye në roje të aktivitetit të tyre të paligjshëm”, u shpreh kreu i qeverisë.

LEXONI GJITHASHTU:

• Ministri Çuçi paralajmëron ndryshime rrënjësore në polici: Disa gjyqtarë po nxjerrin kriminelë nga burgu
• Policia njofton ndëshkimin e mijëra shoferëve në ditë për sjellje të rrezikshme në rrugë