Mustafa i përgjigjet ftesës së Kurtit dhe Osmanit: LDK ka qenë gjithmonë e hapur për dialog

Kryetari në ikje i Lidhjes Demokratike të Kosovës, Isa Mustafa thotë se do të jenë të hapur për biseda dhe dialog në konstituimin e institucioneve.

Duke iu përgjigjur ftesës së djeshme të Albin Kurtit dhe Vjosa Osmanit, Mustafa tha se nuk sheh asgjë të keqe nga bisedat për përgatitjen e konstituimit të Kuvendit.

Sipas tij, LDK nuk është parti e barrikadave.

“LDK gjithherë ka qenë e hapur për biseda dhe dialog. Nuk jemi barrikaduar si të tjerët dhe nuk i kemi gjuajtur të tjerët me gaz e me mollotov, kur është dashur të bisedojmë. Kuvendi është i të gjithëve, jo vetëm i atyre që janë renditur të parët. Nuk shoh asgjë të keqe nga bisedat për përgatitjen e konstituimit të Kuvendit, por se kur LDK do të jetë e gatshme të marrë pjesë, nuk mund të flas”, thotë Mustafa për KosovaPress.

Mbrëmjen e djeshme, në dyert e tri partive parlamentare shqiptare, PDK, LDK, AAK, si dhe komuniteteve, shkuan ftesat e fitueseve të zgjedhjeve, Albin Kurtit dhe Vjosa Osmanit për konsultime rreth konstituimit të institucioneve.