‘Na duhet mbështetje shtesë’, KLGJ i përgjigjet Euronews Albania mbi procesin e vetingut

Zgjatja e afatit të vetingut në drejtësi, edhe nëse mazhoranca dhe opozita nuk bien dakord për ndryshimet kushtetuese, një gjë e ka të sigurt, do të kërkojë buxhet shtesë.

Euronews Albania iu drejtua Këshillit të Lartë Gjyqësor lidhur me debatin e javëve të fundit, se pse këtë proces nuk e vazhdon KLGJ e KLP siç e parashikon Kushtetuta?

Në përgjigjen e kthyer, KLGJ shprehet e gatshme të vijojë procesin, por burimet financiare dhe njerëzore i ka të pamjaftueshme.

“Sa i përket pyetjes tuaj, nëse KLGJ mund të vijojë procesin e vetingut, ju sqarojmë se përveç burimeve njerëzore aktuale, Këshilli i Lartë Gjyqësor do të ketë nevojë për mbështetje shtesë, në mënyrë që të garantohet standardi i procesit të rregullt ligjor për rivlerësimin kalimtar të gjyqtarëve”, thuhet në përgjigjen e KLGJ.

Për vazhdimin e vetingut Euronews Albania pyeti edhe Këshillin e Lartë të Prokurorisë, por nuk ka ende një përgjigje.

Mandati i shkallës së parë të vetingut, Komisionit të Pavarur të Kualifikimit, mbaron në qershor të 2022-it. Deri më tani KPK ka dhënë 455 vendime, 170 shkarkime nga detyra gjyqtarësh dhe prokurorësh ndërsa 182 janë konfirmuar në sistem.