‘Na ulni çmimin e kafes dhe hapni kalçeton’, kërkesat e të burgosurve të Peqinit

Rreth 165 të dënuar në Burgun e Peqinit prej disa ditësh tashmë kanë refuzuar të ushqehen, pasi kërkojnë amnisti të përgjithshme si edhe largimin e drejtorit të Përgjithshëm të Burgjeve Agim Ismaili.

Kërkesat e të burgosurve të Peqinit i janë paraqitur autoriteteve përmes përfaqësuesit të tyre ligjor, Saimir Vishaj.

Letra që z. Vishaj u ka dërguar autoriteteve është siguruar nga Euronews Albania dhe në të përfshihen kërkesa të karakterit legjislativ, ekonomik dhe administrativ.

Të burgosurit e Peqinit kërkojnë ndër të tjera ndryshimin e burgimit të përjetshëm dhe  përcaktimin deri në 20 vite burgim, uljen e çmimit të kafes, hapjen e një kalçetoje, ushqim më cilësor më shumë telefonata me familjarët.

Në listën e kërkesave të të dënuarve është edhe ajo që të punësuarit e dënuar në kuzhinë të jenë edhe myslimanë dhe të krishterë.

Keqmenaxhimi i situatës në burgun e Peqinit solli edhe shkarkimin pak ditë më parë të drejtorit të këtij institucioni, Bukurosh Malluta.