NBA, LeBron James ia kushton fitoren e dytë të Lakersave në finale Kobe Bryantit

Basketbollisti i Los Angeles Lakers, LeBron James ia kushtoi fitoren e radhës në finalet e NBA-së legjendës Kobe Bryant, i cili u nda nga jeta 10 muaj më parë pas një aksidenti me helikopter.

Në stadiumin Advent-Health Arena të Orlandos, ndeshja e dytë kundër Miami Heat u mbyll me rezultatin 124-114 ku James dhe shoku i tij i skuadrës Anthony Davis spikatën me 65 pikë dhe 23 rikuperime të realizuara së bashku.

James përveç 33 pikëve personale shërbeu edhe 9 asiste, duke zbehur totalisht performancën e Jimmy Butler për Miamin.

Lakersat kryesojnë në ndeshje direkte me dy finale të fituara, ndërsa finalja e tretë diskutohet të dielën. Skuadra nuk e ka fituar titullin kampion që prej vitit 2010 dhe i duhen edhe dy fitore të tjera.

Pas përballjes, LeBron u shpreh se kishte dhënë maksimumin në parket “për nder të kujtimit të Bryant”.

“Kemi synim ta nderojmë me performancën tonë në parket, kur luajmë në mendje kemi familjen e Bryant, Vanessën dhe vajzat, jemi me ta, pranë tyre, shpresoj t’i kemi bërë krenarë,” – u shpreh James.

Bryant dhe një nga vajzat e tij, Gianna, humbën jetën në një aksident me helikopter në muajin janar. Bashkë me ta vdiqën edhe shtatë anëtarët e ekuipazhit.

I ashtuquajtur “Black Mamba”, kontribuoi për 20 vite në nivele absolute me skuadrën e Lakers duke fituar 5 tituj kampion, dy vlerësime lojtar i vitit, 18 herë i përfshirë në skuadrën e yjeve dhe dhjetëra rekorde në parket.