NBA, Los Angeles Lakers fiton për herë të pestë radhazi ndaj Houston Rockets

James Harden dhe Christian Wood nuk mjaftuan për Houston Rockets që humbi mbrëmjen e së dielës përballjen me kampionët në fuqi të NBA-it, Los Angeles Lakers.

Në Toyota Center të Houston-it, teksanët vuajtën shumë dy periodat e para ku Lakers realizoi 65 pikë kundrej 46 që Harden e kompani mundën të arrinin.

Në periodën e tretë Rockets bëri diçka më mirë, por nuk mjaftoi pasi në fund Lakers mbajtën avantazhin duke e mbyllur me shifrat 102-120.

Harden dhe Wood realizuan 43 pikë, 7 zotërime nën tabelë dhe 10 asiste së bashku, mirëpo kjo nuk ishte e mjaftueshme. Për Lakers, edhe pse LeBron James nuk ishte në maksimumin e tij, spikati Anthony Davis, i aftë për të realizuar 27 pikë personale.

Great defense leads to great offense.

(?: @SpectrumSN) pic.twitter.com/6xJ9r4c8jO

— Los Angeles Lakers (@Lakers) January 11, 2021

Për Huston kjo ishte humbja e tretë në pesë ndeshjet e fundit, ndërsa në duelet direkte me Lakers kjo ishte humbja e pestë radhazi.

Kampionët nga Los Angeles mbeten në krye të Konferencës Perëndimore duke lënë pas rivalët e tyre të Clippers dhe Phoenix Suns.

Nga ndeshjet e tjera të së dielës në NBA, Golden State Warriors fitoi 106-105 ndaj Toronto Raptors, Minnesota fitoi 96-88 ndaj San Antonios, Denveri 114-89 ndaj New York Knicks ndërsa Oklahoma fitoi 129-116 përballë Brooklyn Nets.