Ndahet nga jeta Claudia Cardinale, ikona e kinemasë italiane dhe ndërkombëtare

Claudia Cardinale, një nga figurat më përfaqësuese të kinemasë italiane dhe botërore, është ndarë nga jeta në moshën 87-vjeçare në Nemours, në rajonin e Parisit, Francë, ku jetonte prej vitesh.

Aktorja u shua pranë fëmijëve të saj pranë saj. “Na lë trashëgiminë e një gruaje të lirë dhe të frymëzuar, si në jetën personale ashtu edhe si artiste”, deklaroi agjenti i saj, Laurent Savry.

E lindur më 15 prill 1938 në Tunis, nga prindër sicilianë që emigruan gjatë protektoratit britanik, Claudia Cardinale hyri në botën e filmit në vitet 1950 dhe ndërtoi një karrierë të jashtëzakonshme që zgjati mbi gjashtë dekada.

Ajo luajti në më shumë se 150 filma, duke punuar me disa nga mjeshtrat më të mëdhenj të kinemasë, përfshirë Luchino Visconti, Federico Fellini, Sergio Leone, Mauro Bolognini dhe Werner Herzog.

Roli i saj si Angelica në “Il Gattopardo” të Visconti-t (ku skena e vallëzimit me Alain Delon mbetet ikonike) dhe paraqitja në “8½” të Fellinit, e vendosën atë në panteonin e kinemasë europiane.

Ndër filmat e tjerë më të rëndësishëm janë “La ragazza con la valigia”, “C’era una volta il West”, “Fitzcarraldo”, “La pelle”, “La storia”, si dhe “The Pink Panther”, që e bëri të njohur edhe në kinemanë amerikane.

Përveç karrierës filmike, ajo pati një angazhim të gjerë në teatër dhe në mbështetjen e autorëve të rinj. Cardinale ishte një figurë e dashur dhe e respektuar në skenën kulturore ndërkombëtare, duke qëndruar larg vëmendjes mediatike të panevojshme, por gjithmonë aktive në art dhe çështje shoqërore.

E vlerësuar me pesë çmime “David di Donatello”, pesë “Nastro d’Argento”, si dhe me çmime për arritje jetësore nga festivalet e Venecias dhe Berlinit, Claudia Cardinale do të kujtohet jo vetëm për bukurinë dhe praninë e saj në ekran, por edhe për integritetin dhe vetëdijen me të cilat e përjetoi artin dhe jetën.