Valdrin Pjetri emërohet në krye të Agjencisë së Trajtimit të Pronave

Kryeministri Edi Rama ka emëruar Valdrin Pjetrin në detyrën e drejtorit të përgjithshëm të Agjencisë së Trajtimit të Pronave (ATP).

Në këtë funksion, Pjetri do të drejtojë institucionin përgjegjës për proceset e njohjes, kthimit dhe kompensimit të pronave, në përputhje me legjislacionin në fuqi.

Valdrin Pjetri ka përfunduar studimet e larta në Financë-Kontabilitet dhe mban një master të nivelit të dytë në Lidership.

Ai ka një karrierë të gjatë në administratën publike, duke mbajtur disa pozicione drejtuese në institucione të ndryshme shtetërore. Nga viti 2010 deri në vitin 2014 ka shërbyer si administrator pranë Ministrisë së Financave, ndërsa në periudhën 2014–2017 ka qenë drejtor i përgjithshëm në Ministrinë e Mbrojtjes.

Në vijim, në vitin 2018 është emëruar drejtor i Hipotekës së Tiranës, ndërsa në vitin 2019 ka mbajtur detyrën e kryeregjistruesit dhe më pas atë të prefektit të Qarkut Shkodër. Që prej vitit 2022 ka ushtruar funksionin e administratorit të AMI pranë Fondit Shqiptar të Zhvillimit.

Gjatë gjithë karrierës së tij, Pjetri ka akumuluar eksperiencë në menaxhim institucional dhe drejtim administrativ në sektorin publik.