Ndërron jetë regjisori Dhimitër Orgocka

Ditën e parë të vitit 2021, regjisori korçar, i cili mbante dhe titullin ‘Mjeshtër i madh’, Dhimitër Orgocka u nda nga jeta në moshën 84 vjeçare.

Ai ka qenë i shtruar në spital ditën e djeshme ndërkohë sot ka pësuar një hemorragji cerebrale që i ka sjellë vdekjen.

Nga bisedat e fundit të profesor Orgockës me disa media, Pallati i Kulturës në Maliq i cili mban emrin e tij ngelet amaneti i fundit i të ndjerit.

Në dhjetor të vitit 2016 Pallati i Kulturës u dogj dhe vazhdon ende të jetë rrënojë.

“Po të jetosh në Maliq e ta shikosh përditë këtë Pallatin e Kulturës si ka katandisur edhe për më tepër po të jesh njeri që je marrë me artin e me kulturën të vjen disa herë më shumë keq se një qytetar i thjeshtë megjithëse nuk e përjashtoj mundësinë se gjithë maliqarëve nuk ju pëlqen që Pallati i Kulturës është në këtë gjendje,” – u shpreh Orgocka, në një intervistë që ka dhënë për Euronews Albania.

Me rreth 104 premiera në teatro të ndryshme anë e mbanë Shqipërisë e me 82 role të interpretuara mjeshtërisht, Dhimitër Orgocka i ka lënë një pasuri të jashtëzakonshme artit shqiptar.

“Gjeneral gramafoni”, “Dasëm e çuditshme”, “Asgjë nuk harrohet” , “Përsëri pranverë”, “Horizonte të hapura”  e shumë tituj të tjerë janë ato që na kujtojnë menjëherë regjisorin dhe aktorin e madh korçar.

Lexoni gjithashtu: 

Pallati i Kulturës në Maliq, Dhimitër Orgocka: Kur dal nga ky pallat më duket sikur dal nga shtëpia ime e rrënuar

I shënuan emrin pro shembjes së Teatrit Kombëtar kundër dëshirës, regjisori shpjegon se si ndodhi