Ndikimi i zgjedhjeve në Bullgari, analistët: Borisov, qasje pozitive ndaj RMV-së

Maqedonia e Veriut pritet të normalizojë marrëdhëniet me Bullgarinë gjatë periudhës në vazhdim, nëse ish kryeministri bullgar, Bojko Borisov arrin që të formojë një qeveri të qëndrueshme, pasi u bë e qartë se partia e tij GERB është fituese e zgjedhjeve.

Sipas analistëve politik në Maqedoninë e Veriut, në fushatën e fundit zgjedhore në Bullgari, Maqedonia e Veriut thuajse nuk ishte temë fare dhe kjo tregon se bullgarët kanë tashmë qasje më pozitive ndaj maqedonasve.

“Borisovi ka qenë iniciatori për zbutjen e marrëdhënieve bashkë me ish kryeministrin Zaev. Kështu që edhe fakti që dje i vetmi që dha deklaratë për Maqedoninë ishte kryetari Radev, edhe atë me pyetje të gazetarit nga Maqedonia. Domethënë nuk ka qenë tema Maqedoni, dhe për ne çdo tentativë që të mos bëhet temë kryesore Maqedonia është për tu përshëndetur”, thotë analisti Albert Musliu.

Ndryshe mendon analisti Xhelal Neziri, i cili thotë se përplasjet e mundshme politike në Bullgari do të përfshinë edhe plagët historike mes dy vendeve.

“Bullgaria edhe gjatë periudhës së ardhshme do të ballafaqohet me një jo stabilitet politik, i cili natyrisht se do të reflektohet edhe në drejtim të implementimit të marrveshjes se fqinjësisë së mirë me Maqedoninë e Veriut. Këto raporte me Maqedoninë e Veriut do të përdoren dhe keqpërdoren për të grumbulluar pikë politike, do të përdoren në kontekst të brendshëm të politikës bullgare me qëllim që secila palë ti forcojë pozicionet që ka. Mungesa e një fituesi të qartë, me legjitimitet të plotë për të formuar Qeveri do të prodhojë gjithsesi kriza që mund të reflektohen edhe në Maqedoninë e Veriut”, u shpreh ai.

Analistët pajtohen se element shtesë drejt normalizimit të marrëdhënieve do jetë edhe mungesa e partisë së  Krasimir Karakaçanovit që është ultra nacionaliste dhe ishte më e zëshmja kundër heqjes së vetos ndaj Maqedonisë së Veriut.

Kësaj urrejtje i janë përgjigjur edhe maqedonasit etnik në forma të ndryshme.

LEXONI GJITHASHTU

• Borissov fiton zgjedhjet në Bullgari, partia e tij akuzohet për korrupsion
• ​Zgjedhjet bullgare, votohet edhe në Shqipëri
• A do të rikthehet Bojko Borissov? Bullgarët sot sërish në zgjedhje