Ndotja në Durrës, banorët e Manzës kundërshtojnë dërgimin e plehrave nga qyteti

Prej ditësh kazanët e mbeturinave në qytetin e Durrësit janë tejmbushur duke shkaktuar ndotje të konsiderueshme mjedisore. 

Mbyllja e vendgrumbullimit të Porto Romanos ka bërë që Bashkia Durrës fundjavën e kaluar të gjejë si zgjidhje dërgimin e plehrave ne Manëz. Ky vendim i fundit është kundërshtuar nga banorët, të cilët nuk kanë pranuar që mbetjet urbane të Durrësit të hidhen atje.

Gazetarja e Euronews Albania Dorina Halili raportoi nga Durrësi se qytetarët dhe turistët po përballen çdo ditë me pamje aspak të hijshme të qytetit, teksa Bashkia nuk i ka mbledhur mbeturinat.

Në janar të këtij viti qeveria vendosi mbylljen e vendgrumbullimit të Porto Romanos, ndërsa në dhjetor 2019 Kryeministri Edi Rama qe shprehur se Durrësi mund t’i dërgonte mbeturinat në vengrumbullimin e Sharrës në Tiranë.

Mirëpo situata aktuale e ka vënë në vështirësi Bashkinë Durrës, së cilës i kushton më shumë transportimi në Tiranë dhe i nevojiten fonde.

Gazetarja Halili tha se Bashkia Durrës i ka kërkuar fonde qeverisë, fonde të cilat ende nuk janë miratuar megjithëse pritet që problematika të zgjidhet brenda kësaj jave.

Vendgrumbullimi i Porto Romanos është mbyllur, për t’i hapur rrugë zhvillimit të një projekti që parashikon rikuperimin e zonës dhe kthimin në një park.

Aktualisht Bashkia Durrës i ka dërguar mbeturinat në një vendgrumbullim lokal të Manzës rreth 25 kilometra më në lindje nga Porto Romano, distancë sa gjysma e largësisë me Sharrën në Tiranë.

Lexoni gjithashtu:

Jo vetëm naftë, kompania koncesionare kërkon shfrytëzimin maksimal të Porto Romanos

Pasi e ndotën me naftë, Porto Romano në Durrës do të kryejë një tjetër funksion