Ndryshimet në qeveri, Manjani: Rama zgjodhi që çështjen e detit ta mbajë mbi shpatulla Olta Xhaçka

Ish-ministri i Drejtësisë, Ylli Manjani u shpreh në Euronews Albania se ndryshimet në qeverinë Rama nuk janë surprizë. Ai theksoi se Rama ka shkarkuar veten si ministër të Jashtëm, pasi Gent Cakaj nuk e ka mbajtur kurrë këtë post.

“Nuk ka ndonjë surprizë por nga pikëpamja zyrtare, ligjore dhe Kushtetuese, më interesante është çështja e ministrisë së Jashtme. I bie që Rama të propozojë shkarkimin e vetes si ministër i Jashtëm për të ngarkuar zonjën Olta Xhaçka. Cakaj nuk ka qenë kurrë ministër i këtij shteti”, u shpreh Manjani.

“Lajmi që doli dje që dha dorëheqjen Gent Cakaj është një idiot. S’ka lidhje fare në kontekstin shtetëror të fjalës. Në kuptimin shtetëror dhe kushtetues, detyrën e ministrit të Jashtëm e kryen sot kryeministri, është ende Rama ministër i Jashtëm. Ka vendosur të shkarkojë veten, të shohim do të dekretohet shkarkimi apo jo”, tha ai më tej.

Sipas Manjanit largimi i Ramës nga posti i ministrit të Jashtëm, vjen për shkak të çështjes së detit me Greqinë.

Manjani nënvizoi se tashmë për çështjen e detit duhet dikush që të firmosë dhe për këtë Rama ia la përgjegjësinë Xhaçkës.

“Unë besoj se ka një shtrëngesë publike dhe zyrtare Edi Rama. Është një shtrëngesë e cila vjen për shkak të debatit që ka çel për çështjen e detit me Greqinë. Tashmë duhet një emër përgjegjës, dikush që të firmosë letrat dhe të marri përgjegjësinë, dhe ky dikush është para-zgjedhur që të jetë Olta Xhaçka”, theksoi ish-ministri i Drejtësisë.

“Përgjegjësinë direkte zyrtare ligjore deri më sot e ka Edi Rama. Nga kjo pikëpamje ai do që ta transferojë këtë përgjegjësi. Eventualisht në çfarëdo lloj debati, qoftë në planin e debatit publik dhe ligjor, ka një diskutim ligjor dhe shumë të rëndë, të rreptë dhe dikush duhet ta marrë këtë përgjegjësi. Ka zgjedhur që të jenë shpatullat e Olta Xhaçkës, mbase e mban Olta. Pjesa e ministrisë së Mbrojtjes, Niko, është thjesht një rutinë”, tha ai.

Lexoni gjithashtu:

Peleshi ministër i Mbrojtjes, Mentor Kikia: Strategji politike e Ramës për zgjedhjet e 25 prillit

Ndryshime në qeveri, Ministria e Jashtme i kalon Xhaçkës, rikthehet Niko Peleshi