Në fokus të drejtat e shqiptarëve në Serbi, Kurti pret në takim deputetin Shaip Kamberi

Kryetari i Partisë Për Veprim Demokratik, Shaip Kamberi, i cili është edhe shef i Grupit Parlamentar “Lugina e Bashkuar-SDA” këtë të hënë ka qëndruar në Kosovë, ndërsa është pritur në takim nga kryeministri i vendit, Albin Kurti.

Lajmi për takimin Kurti-Kamberi bëhet i ditur nga zyra për shtyp e kryeministrit të Kosovës. Ata biseduan për çështjen e të drejtave të shqiptarëve që jetojnë në Preshevë, Medvegjë dhe Bujanoc, por edhe në vendet e tjera në Serbi ku jetojnë shqiptarë.

“Kryeministri Kurti dhe z. Kamberi biseduan për çështjen e të drejtave të shqiptarëve në Preshevë, Medvegjë e Bujanoc dhe në viset e tjera në Serbi.Në takim u diskutua për të drejtat që i kanë shqiptarët përmes Këshillit Nacional Shqiptar, si edhe rrudhjen e tyre nga një aktgjykim i Gjykatës Kushtetuese të Serbisë, nga janari i vitit 2014”, njofton zyra e kryeministrit Kurti.

Temë tjetër, në të cilën u përqendrua biseda mes Kurtit dhe Kamberit ishte edhe takimi i 15 qershorit që u mbajt në Bruksel në kuadër të dialogut të ardhshëm ndërmjet Kosovës dhe Serbisë.

“Temë e bisedës ishin edhe dy samitet e liderëve të gjashtë vendeve të Ballkanit Perëndimor, të mbajtura këtë muaj në Tiranë dhe në Vjenë”, thuhet ndër të tjera në njoftim.

LEXONI GJITHASHTU:

• Anton Berisha për procesin e dialogut: Kosova duhet të jetë në të njëjtën linjë me aleatët strategjikë
• Albin Kurti: Serbia të njohë pavarësinë e Kosovës dhe të ballafaqohet me të kaluarën