Në kërkim dhe vëllai i autorit/ Policia zbardh vrasjen në Fier: Pati shkëmbim zjarri

Policia ka zbardhur konfliktin e ditës së djeshme në Fier që çoi në vrasjen e 41-vjeçarit Elton Javori nga Agim Gashi.

Policia bën me dije se ditën e djeshme në lagjen “16 Prilli”, Fier, nga një automjet tip “Benz”, nga krahu i pasagjerit, është qëlluar me armë zjarri në drejtim të automjetit tip “Fuoristradë” e cila drejtohej nga viktima.

Pas këtij veprimi, Elton Javori, ka qëlluar disa herë me armë zjarr pistoletë në drejtim të automjetit tip “Benz”.

Por për fat të keq nga shkëmbimi i zjarrit mbeti i vrarë 41-vjeçari.

Nga hetimet rezultoi se autorët që udhëtonin me automjetin tip “Benz” janë shtetasit Agim Gashi, 35 vjeç dhe K. G., 33 vjeç(vëllezër), të cilët janë shpallur në kërkim dhe po punohet intensivisht për kapjen dhe vënien e tyre përpara përgjegjësisë ligjore.

Nga këqyrja e vendit të ngjarjes, në afërsi të automjetin tip “Fuoristradë”, u gjet 1 armë zjarri pistoletë me nr trupi të paidentifikuar e cila u sekuestrua në cilësinë e provës materiale.

Motivi i kësaj ngjarjeje kriminale dyshohet një konflikt i nisur disa kohë më parë midis shtetasit Agim Gashi dhe Elton Javorit për motive të dobëta.

Në drejtimin e Prokurorisë vijon puna hetimore për sqarimin e rrethanave të kësaj ngjarjeje dhe mbledhjen e te gjitha provave për dokumentimin e plotë të saj.

Materialet procedurale janë referuar në Prokurorinë pranë Gjykatës së Shkallës së Parë të Juridiksionit të Përgjithshëm Fier, në ngarkim të shtetasve A.G. dhe K.G., të dyshuar për kryerjen e veprës penale “Vrasje me paramendim” e kryer në bashkëpunim dhe “Prodhimi dhe mbajtja pa leje e armëve dhe municionit luftarak”.

LEXONI GJITHASHTU: 

• VIDEO/ Humbi jetën 41-vjeçari, dalin pamjet nga momenti i vrasjes në Fier
• FOTO| Kush është autori i vrasjes në Fier