Në kërkim ndërkombëtar për drogë dhe grup kriminal, arrestohet 31-vjeçari në Tiranë

Policia e Tiranës ka arrestuar 31-vjeçarin Endri Pashaj, i cili ishte shpallur në kërkim ndërkombëtar nga autoritetet italiane.

Mbi të riun rëndojnë veprat penale “Grup kriminal” dhe “Trafikimi i lëndëve narkotike”, për të cilat maksimumi i dënimit është 30 vite. 

Policia bën me dije se i riu është arrestuar në ambientet një lokali në zonën e Unazës së Re në kryeqytet. 

“Specialistët për Hetimin e Krimit në Komisariatin e Policisë Nr. 2, pas shkëmbimit në kohë reale të informacioneve me Interpol Tiranën, organizuan dhe finalizuan operacionin policor të koduar “Befasia”, në kuadër të të cilit, në Unazë të Re, në ambientet e një lokali, u bë e mundur kapja e shtetasit të shpallur në kërkim ndërkombëtar: E. P., 31 vjeç, banues në Tiranë.

Ky shtetas ishte shpallur në kërkim ndërkombëtar nga autoritetet italiane, pasi Gjykata e Milanos ka lëshuar urdhrin e arrestit ndërkombëtar duke caktuar masën e sigurisë “Arrest në burg”, për veprat penale “Grup kriminal” dhe “Trafikimi i lëndëve narkotike”, për të cilat maksimumi i dënimit është 30 vite”, thuhet në njoftimin e Policisë.