Në kërkim nga autoritetet në Kosovë për drogë, vihet në pranga 34-vjeçari në Elbasan

Një 34-vjeçar është vënë në pranga nga policia në Elbasan. Arrestimi i tij ka ardhur pasi ai rezulton i shpallur në kërkim nga autoritetet në Kosovë.

Sipas njoftimit të policisë i arrestuari është vënë në pranga me qëllim ekstradimin e tij në Kosovë. Ai është dënuar me burg nga Gjykata e Pejës për veprat penale “Kultivimi i narkotikëve” dhe “Prodhimi dhe shitje e narkotikëve”.

‘DVP Elbasan/I shpallur në kërkim ndërkombëtar nga autoritetet kosovare, për veprimtari kriminale në fushën e narkotikëve, kapet dhe arrestohet me qëllim ekstradimin, 34-vjeçari.

Në vijim të punës për lokalizimin, kapjen dhe ndalimin e shtetasve të shpallur në kërkim, Seksioni për Hetimin e Narkotikëve i DVP Elbasan, në bashkëpunim me Komisariatin e Policisë Cërrik, lokalizuan, kapën dhe arrestuan me qëllim ekstradimin në Kosovë, shtetasin: A. S., 34 vjeç, banues në Cërrik.

Ky shtetas ishte shpallur në kërkim ndërkombëtar, pasi Gjykata Themelore e Pejës i ka caktuar masën e sigurisë “Arrest në burg”, për veprat penale “Kultivimi i narkotikëve” dhe “Prodhimi dhe shitje e narkotikëve”. Interpol Tirana, në bashkëpunim me autoritetet kosovare, kreu procedurat për ekstradimin e 34-vjeçarit’, njofton policia.