Nën akuzë për krime të rënda, OFL vë në shënjestër 4 persona në Tiranë dhe Shkodër

Operacioni Forca e Ligjit u ka dërguar këtë të enjte formularin katër personave, tre prej tyre në kryeqytet dhe një tjetër në Shkodër.

Sipas parashikimeve dhe rregullave të OFL-së, personat e cilësuar si subjekt i Ligjit Special do duhet t’u përgjigjen me shkrim brenda 48 orësh pyetjeve, ndërsa përgjigjet e tyre i dërgohen më pas SPAK, për veprime të mëtejshme.

“Vijon pa ndërprerë Operacioni Forca e Ligjit, në zbatim të detyrave të përcaktuara në Aktin Normativ të datës 31 janar 2020. Në kuadër të zbatimit të Ligjit Special për masat pasurore ndaj individëve të dënuar apo akuzuar për krim të organizuar apo krime të rënda, OFL i ka nisur kërkesat me shkrim për vetëdeklarimin e burimeve të pasurisë, shtetasve:

– O. I., banues në Tiranë, i dënuar për veprën penale “Vjedhja me dhunë”;

– K. A., banues në Tiranë, i dënuar për veprën penale “Vjedhja me armë”;

– E. K., banues në Tiranë, i dënuar për veprën penale “Vjedhja me armë, e kryer në bashkëpunim”;

– I. R., banues në Shkodër, person nën hetim, për të cilin Gjykata e Shkallës së Parë për Krimet e Rënda ka caktuar masën e sigurimit personal “Arrest në burg”, për veprat penale “Shtrëngim me anë të kanosjes për dhënien e pasurisë, e kryer në bashkëpunim, në kuadër të grupit të strukturuar kriminal” dhe “Kryerja e veprave penale nga organizata kriminale apo grupi i strukturuar kriminal”. Këta individë, si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL-së dhe më pas, përgjigjet e marra do t’i dërgohen SPAK-ut, për veprime të mëtejshme”, njofton policia. 

Operacioni Forca e Ligjit ka vijuar punën duke adresuar personat në qytetet e vendit, të cilët kanë pasur probleme të thella në raport me ligjin.