Netanyahu: Lufta mund të zgjasë, por mund të përfundojë shpejt

Izraeli po vazhdon sulmet ajrore ndaj objektivave iraniane, ndërsa kryeministri Benjamin Netanyahu po tregohet i kujdesshëm në deklaratat e tij publike, në përpjekje për të ruajtur mbështetjen politike dhe ushtarake të Shteteve të Bashkuara.

Sipas raportimeve, Netanyahu ka shmangur devijimin nga qëndrimet e Shtëpisë së Bardhë, duke pranuar edhe ndalimin e sulmeve ndaj infrastrukturës energjetike iraniane pas një kërkese të drejtpërdrejtë nga Donald Trump.

Në një deklaratë për mediat të premten, Netanyahu tha në hebraisht se lufta do të “zgjasë për aq kohë sa të jetë e nevojshme”, ndërsa në anglisht shtoi se ajo mund të përfundojë “shumë më shpejt nga sa mendojnë njerëzit”.

Analistët vlerësojnë se nëse SHBA vendos të ulë intensitetin e operacioneve kundër Iranit, Izraeli pritet të ndjekë të njëjtën linjë. Megjithatë, nëse Uashingtoni rrit angazhimin, veçanërisht për zhbllokimin e Ngushticës së Hormuzit, kjo mund t’i japë Izraelit më shumë kohë për të vijuar goditjet ndaj objektivave ushtarake iraniane.

Ndërkohë, Ministri i Mbrojtjes, Israel Katz, konfirmoi se sulmet ajrore izraelite “do të intensifikohen”.