Ngjarje tronditëse në Kavajë, gjenden të vdekur bashkëshortët, gruja ishte e djegur

Një ngjarje tronditëse ka ndodhur paraditen e së shtunës në fshatin Manskuri të Kavajës.

Rreth orës 11:45, policia deklaron se ka gjetur një makinë të djegur plotësisht në këtë fshat.

Brenda mjetit, është gjetur një trup i djegur, që dyshohet se i përket F.Sh, 45 vjeçe. Nga kontrolli i zonës përreth është gjetur i varur në një pemë bashkëshorti i saj, B.Sh, 48 vjeç.

Sipas policisë, burri dyshohet se ka djegur bashkëshorten dhe më pas ka varur veten.

Gjithçka mësohet se ka ardhur pas konflikteve mes çiftit për shkaqe xhelozie.

Bashkëshortët ishin në proces divorci në gjykatë dhe ata dyshohet se kanë pasur konflikte kohët e fundit.

Çifti i bashkëshortëve kishte shumë vite martesë dhe nga  marrëdhënia e tyre kanë ardhur në jetë një djalë 17 vjeç dhe një vajzë më e madhe.

Të afërm të viktimave tregojnë se marrëdhënia mes çiftit ishte prishur muajt e fundit dhe shpeshherë kishin pasur edhe konflikte që  kishin përfunduar në agravim të situatës dhe përplasje mes tyre.

Pavarësisht se policia kishte informacion për përplasjet por zonja nuk ka kërkuar asnjëherë urdhër mbrojtje.