Nicholas Giacobbe komenton zbatimin e marrëveshjes: Përparim i mirë nga Kosova dhe Serbia

I ngarkuari me punë në ambasadën e SHBA-së në Kosovë, Nicholas Giacobbe ka folur mbi zbatimin e marrëveshjes së Brukselit sa i përket reciprocitetit për targat e automjeteve.

Zbatimin e marrëveshjes e cilëson “përparim të mirë” si për Kosovën ashtu dhe për Serbinë, ndërsa thekson se prania e KFOR-it në pikat kufitare në Bërnjak dhe Jarinjë është e përkohshme.

“Për dy javë presim që operacionet kufitare të kthehen në normalitet”, tha ai.

Në këtë kuadër të zbutjes së tensioneve, z. Giacobbe fton të dyja shtetet, që të rifillojnë procesin e dialogut.

“Është koha për të ecur me këtë vrull dhe për të rifilluar me zell dialogun”, ka thënë ai.

Policia e Kosovës ka konfirmuar se në pjesën e veriut, pas largimit të barrikadave dhe tërheqjes se njësive speciale gjithçka është rikthyer në normalitet.

“Gjendja e sigurisë në pjesën veriore të Republikës së Kosovës, pas largimit të pengesave, lirimit të rrugëve për qarkullim dhe lëvizje të lirë i është kthyer normalitetit, përderisa njësitet policore patrulluese përfshirë ato kufitare vazhdojnë me realizimin e detyrave dhe përgjegjësive ligjore”, thejsoi policia, me anë të një komunikate të shpërndarë për mediat.