Nis gjyqi masiv ndaj 492 anëtarëve të dyshuar të bandës “MS-13” në El Salvador, akuzohen për mijëra krime

Departamenti i Drejtësisë në El Salvador ka nisur të hënën gjyqin për 492 anëtarë të dyshuar të bandës Mara Salvatrucha (MS-13), përfshirë edhe bashkëthemelues dhe drejtues të saj.

Autoritetet i akuzojnë ata për një sërë krimesh të rënda, përfshirë urdhërimin e vrasjes së 87 personave gjatë një fundjave në mars të vitit 2022. Sipas zyrës së prokurorisë, 486 nga të pandehurit dyshohet se kanë kryer rreth 47,000 vepra penale midis viteve 2012 dhe 2022.

Prokuroria ka deklaruar se ka “prova të mjaftueshme për të kërkuar dënimet më të rënda”, pa specifikuar nëse do të kërkohet burgim i përjetshëm, një masë që mund të aplikohet sipas reformave të fundit ligjore në vend për krime të rënda si vrasje dhe terrorizëm.

Në El Salvador po zhvillohen gjithnjë e më shumë gjykime masive, në një kontekst ku rreth 91,000 persona të dyshuar janë ndaluar nën gjendjen e jashtëzakonshme të vendosur katër vite më parë nga presidenti Nayib Bukele, si pjesë e luftës kundër bandave kriminale.

MS-13 dhe rivalët e saj të Barrio 18 thuhet se kontrollonin pjesën më të madhe të territorit në vend, ndërsa sot autoritetet i kanë shpallur organizata terroriste.

Presidenti Nayib Bukele gëzon mbështetje të lartë publike për uljen e kriminalitetit, por organizatat për të drejtat e njeriut kanë ngritur shqetësime serioze mbi pasojat e gjendjes së jashtëzakonshme, përfshirë vdekjet në burgje, raportimet për tortura dhe arrestime masive të kryera pa urdhër gjykate ndaj personave që pretendohet se janë të pafajshëm.