Nis gjyqi ndaj UÇK-së në Hagë, ish-komandanti Mustafa: Gjykata si zyra e Gestapos

Gjykata Speciale në Hagë, që po heton krimet e dyshuara të UÇK-së hapi të mërkurën çështjen e parë ndaj një ish-komandanti të njësisë paraushtarake, nën akuzën e torturimit të të burgosurve gjatë konfliktit të viteve 98-99 me Serbinë.

Në fillim të seancës, Salih Mustafa, 50 vjeç, u vetë deklarua i pafajshëm për akuzat për krime lufte, duke e krahasuar gjykatën e posaçme me policinë sekrete të epokës së nazizmit.

“Po, po, saktë. Nuk jam fajtor për akuzat e sjella këtu nga zyra e Gestapos”, tha Mustafa.

Ai akuzohet edhe për vrasje dhe drejtimin e një qendre burgimi, ku të burgosurit ishin subjekt i rrahjeve dhe torturave. Nga ana e tyre, prokurorët e çështjes sqaruan se në rastin e Mustafës viktimat ishin edhe shqiptarë të Kosovës.

“Akuzat ndaj të pandehurit lidhen me përfshirjen individuale të tij në burgimin, keqtrajtimin dhe torturimin e qytetarëve kosovarë. Ky proces lidhet me përgjegjësinë personale të zotit Mustafa, veprimet e të cilit kanë shkaktuar vuajtje dhe plagë të thella në trupat dhe mendjet e viktimave që përjetuan dhunën e tij”, u shpreh Jack Smith, prokuror i Gjykatës Speciale.

Pasi dëgjoi deklaratat e akuzës në hapje të seancës, Mustafa nuk u kthye në sallën e gjyqit për të dëgjuar deklaratat e avokatëve të viktimave.

I dyshuari kryesor i Gjykatës Speciale mbetet ish-kryeministri dhe ish-presidenti i Kosovës, Hashim Thaçi, që u vetë dorëzua vitin e kaluar për t’u përballur me akuzat për krime lufte dhe kundër njerëzimit.