Nis sot vaksinimi në Kosovë, të parët vaksinohen personeli shëndetësor dhe personat mbi  80 vjeç

Nis sot zyrtarisht  procesi i vaksinimit anti-COVID në Kosovë.

Vaksinimi do të kryhet në Klinikën Infektive dhe sallën “1 Tetor”, për t’u shtrirë më pas edhe në komuna të tjera. Të parët që do të fillojnë të vaksinohet do të jenë personeli shëndetësor të cilët janë në vijë të parë të frontit dhe personat mbi moshën 80-vjeçare me sëmundje kronike më të rënda. 24 mijë qytetarë do ta marrin dozën e parë të vaksinës ndërsa doza e dytë do të injektohen me sasinë e radhës së vaksinave që pritet të mbërrijë në Kosovë.

Mbrëmë kryeministri i Kosovës, Albin Kurti u vaksinua në sallën “1 Tetori” në Prishtinë, e më pas zyrtarja e OBSH-së në Kosovë, Isme Humolli, infektologu Sali Ahmeti dhe aktori Selman Jusufi.

Të dielën mbrëma mbërriti në Kosovë kontingjenti i parë i vaksinave anti-COVID me rreth 24 mijë doza. Këto dërgesa, të parat për Kosovën, janë siguruar nga programi COVAX i Organizatës Botërore të Shëndetësisë, i cili synon furnizimin me vaksina të vendeve në zhvillim.