Nis viti i ri shkollor në Kosovë nën masa anti-COVID, kufizime edhe për restorantet dhe hotelet

Në Kosovë, pas dy shtyrjeve të njëpasnjëshme, ka filluar viti i ri shkollor. Ministria e Arsimit kishte parashikuar që nxënësit të uleshin në banka më 1 shtator, por për shkak të rasteve të shtuara me COVID-19, fillimi i shkollës u shty për në 13 shtator dhe më pas më 27 shtator.

Ndërkohë, po për shkak të situatës COVID, në klasa nuk do të lejohen më shumë se 20 nxënës dhe nëse ky numër është më i madh, atëherë mësimi do të zhvillohet me turne.

Po në kuadër të masave anti-COVID, me një vendim të qeverisë së Kosovës, duke filluar nga data 27 shtator, baret, restorantet, hotelet do të lejohen të shfrytëzojnë vetëm 50 % të hapësirës së brendshme dhe 70 % të hapësirës së jashtme. Ndërkohë që klientët nuk do të pranohen nëse nuk paraqesin certifikatën për marrjen e një ose dy doza vaksina apo një test të shpejtë, jo më të vjetër se 48 orë.

Për sa i përket orës policore, ajo nuk ka ndryshuar dhe kufizimi i lëvizjes mbetet i njëjtë nga ora 22.00 deri në orën 05.00.

LEXONI GJITHASHTU:

• Tarifat në universitet, Shqipëria të njëjtin nivel me RMV, Kosova heq pagesat