Niveli i ujit mbi 40 cm, vijon e bllokuar rruga në Obot! Situata në Bashkinë Shkodër e qëndrueshme

Situata në territorin e Bashkisë Shkodër paraqitet e qëndrueshme, me nivele të ujit nën kuotat kritike dhe pa problematika të evidentuara. Në Obot vazhdon të jetë e bllokuar rruga për mjetet e ulëta. Rruga është e kalueshme vetëm me mjete të larta.

Niveli i ujit mbi rrugë arrin mbi 40cm. Sipërfaqja e tokës bujqësore e përmbytur vlerësohet në 100 Ha, kryesisht ne fshatrat Obot, Muriqan. Në Dajç janë përmbytur 20 Ha, kryesisht në Pentar ndërsa në Velipojë vlerësohet se janë përmbytur 101 Ha.

Nivelet e ujit në lumenjtë Bunë dhe Drin mësohet se mbeten të kontrolluara dhe brenda parametrave të sigurisë. Në Urën e Vjetër të Bunës, niveli i ujit është 8.10 m, ndërsa në Urën e Bahçallëkut, lumi Drin paraqitet në kuotën 7.50 m.

Në Njësinë Administrative Dajç, kuota e ujit është 6.20 m. Rënia e prurjeve në lumenjtë Kir dhe Gjadër, mungesa e reshjeve të shiut dhe ulja e temperaturave po ndikojnë pozitivisht në stabilizimin e situatës hidrike në territor.

Mësohet se sipërfaqe totale e përmbytur janë 221 Ha. Gjithashtu bëhet me dije se nuk ka asnjë banesë të përmbytur dhe me prezencë uji në të gjithë territorin e Bashkisë Shkodër.