Sulm me thikë brenda xhamisë “Dine Hoxha” në Tiranë, pesë të plagosur

Pesë persona mbetën të plagosur nga një sulm me thikë në xhaminë “Dine Hoxha” në Tiranë. Policia ndërhyri në kohë duke arrestuar autorin.

Ngjarja ndodhi rreth orës 14:30 kur Rudolf Nikolli, 34 vjeç, ka sulmuar me thikë brenda mjediseve të xhamisë së rrugës së Kavajës pesë besimtarë. Në dalje nga xhamia Nikolli ka kërcënuar dhe kalimtarë të rastit.

Gazetari i Euronews Albania, Merin Maçi raportoi se sulmi ndodhi teksa besimtarë të shumtë po kryenin ritet fetare në xhami. Të plagosurit janë dërguar në spital, jashtë rrezikut për jetën.

Imami Ahmed Kalaja tha përmes një videoje në Facebook se mes të plagosurve ishin dhe punonjës të xhamisë. Kalaja këmbënguli se situata është nën kontroll. Ai falënderoi policinë dhe qytetarët që ndërhynë në kohë për të mënjanuar përshkallëzimin e ngjarjes.

Imami Kalaja është treguar i kujdesshëm duke “uruar që kjo ngjarje të mos jetë sulm terrorist”, por një akt i rrjedhur nga “gjendja e rënduar e shëndetit mendor të autorit”. Njësoj edhe policia në njoftimin e saj nuk i ka dhënë cilësime të caktuara ngjarjes.

Po ashtu edhe kreu i Komunitetit Mysliman të Shqipërisë, Bujar Spahiu ka dënuar sulmin e sotëm në xhaminë “Dine Hoxha”, ndërsa u bën thirrje organeve të zbardhin ngjarjen.

“Personi është në duart e forcave të rendit. Kërkojmë nga organet përkatëse zbardhjen sa më parë të kësaj ngjarje e cila lëndoi besimtarët në këto ditë ramazani”, shkruan ai.

Sulmi me thikë në xhaminë e rrugës së Kavajës ndodh teksa besimtarët myslimanë agjërojnë muajin e Ramazanit, një muaj i shenjtë për ta.

Burime për Euronews Albania bënë me dije se Nikolli ka qenë në kërkim nga policia për një sulm, gjithashtu me thikë, të ndodhur në muajin mars në terminalin e autobusëve në Tiranë.

Lexoni gjithashtu: 

Imami i xhamisë “Dine Hoxha” dënon sulmin me pesë të plagosur