Largimi i Fernando Santos pas 8 vitesh në krye të kombëtares së Portugalisë i hapi rrugë emërimit të një tekniku të ri. Luzitanët nuk humbasin kohë kështu që menjëherë gjejnë zëvendësuesin. Roberto Martinez është trajneri i sapo emëruar i Portugalisë, me tashmë disa objektiva në krye të skuadrës. Mbërritja në Euro 2024 që zhvillohet në Gjermani është prioritet, ndërkohë një tjetër detyrë e spanjollit është rikthimi në kombëtare i Kristiano Ronaldos.

49-vjeçari ka drejtuar disa skuadra në karrierën e tij, ku e nisi fillimisht tek Suonsi, e më pas tek Uigan, Everton dhe kombëtaren e Belgjikës. Rrugëtimi i tij tek djajtë ishte pozitiv, ndërkohë fështimi në Botëror bëri që ai të shkarkohej, duke kërkuar diçka të re.

E njëjta gjë ndodhi dhe me Fernando Santos, që u largua nga Portugalia menjëherë pas eleminimit nga botërori i Katarit. Situata e krijuar me Cristiano Ronaldon bëri që ndaj tij të shpërthenin akuzat, kështu që gjithçka u vulos pas ndeshjes me Marokun. Ai arriti të fitonte Europianin e 2016-ës me luzitanët, ku mposhti Francën në finale me rezultatin 1-0.