‘Nuk financojmë mure’, Von der Leyen përjashton barrierat fizike kundër emigrantëve

Presidentja e Komisionit Evropian, Ursula von der Leyen përjashtoi të premten çdo mundësi për financimin e ngritjes së mureve me tela me gjemba për të penguar mbërritjen e emigrantëve.

Reagimi i saj erdhi pasi presidenti i Lituanisë deklaroi se nevojitej një barrierë fizike për të mbrojtur kufijtë e BE-së nga Bjellorusia, që po i përdor emigrantët si armë kundër bllokut.

Por Von der Leyen u zotua se do të vazhdojë presionin ndaj Minskut, kur kanë kaluar 4 muaj nga vendosja e sanksioneve ndaj ekonomisë bjelloruse, për shkak të dorës së hekurt të përdorur nga presidenti Lukashenko ndaj protestuesve që kundërshtonin rizgjedhjen e tij në gusht të 2020-s.

“Ne jemi shumë të shqetësuar për situatën në kufi me Bjellorusinë. Ne e konsiderojmë sjelljen e qeverisë bjelloruse një sulm hibrid. Njerëzit e përdorur nga presidenti Lukashenko janë viktima dhe ne duhet t’i ndihmojmë ata. Jeta e njeriut nuk duhet të përdoret për qëllime politike dhe në këtë rast kemi të bëjmë me një instrumentalizim të emigracionit për t’i bërë presion BE-së. Ndaj ne do vijojmë presionin ndaj regjimit të Lukashenkos”, tha Ursula von der Leyen, presidente e Komisionit Evropian.

Nga ana e saj, Bjellorusia akuzon bllokun evropian për shkaktimin e krizës humanitare në kufirin e saj.

BE ka përforcuar rregullat për azil dhe kufijtë e jashtëm që kur mbi 1 milion refugjatë arritën në Evropë përmes Mesdheut 6 vjet më parë.

Gjithashtu, Unioni ka nënshkruar marrëveshje me vende si Turqia dhe Libia që refugjatët të sistemohen në vende të tjera dhe jo në Evropë.