Nuk hapen negociatat, Çika: Ndarja e Shqipërisë nga RMV e vetmja zgjidhje, secili të vlerësohet sipas meritës 

Emilio Çika, pedagog i marrëdhënieve ndërkombëtare, tha për Euronews Albania se vendimi i marrë dje nga Këshilli i ministrave të Jashtëm të BE për të mos hapur negociatat për Shqipërinë dhe RMV nuk ishte i papritur, madje sipas tij, e kundërta do të kishte qenë një surprizë.

Z. Çika theksoi se e vetmja rrugë për të dalë nga ky ngërç është ndarja e Shqipërisë nga Republika e Maqedonisë së Veriut në rrugën e tyre të integrimit, në mënyrë që secili prej vendeve të vlerësohet në bazë të meritës.

Nisur nga zhvillimet e deritanishme, ai u shpreh skeptik se mund të kemi ndonjë zhvillim pozitiv me Presidencën sllovene gjatë këtij viti.

“Ky proces është problematik, zgjidhja është shkëputja e të dyja shteteve në procesin e integrimit. Kjo problematikë duhet tejkaluar, e gjitha shtyhet për Presidencën sllovene, por nuk pres asnjë zhvillim të madh edhe gjatë këtij viti. E shoh të vështirë gjatë Presidencës sllovene. Duhet bërë ndarja e të dyja shteteve për t’u vlerësuar secili sipas meritës”, u shpreh z. Çika.

Shqipëria nuk arriti dot të merrte një datë për negociatat me Bashkimin Evropian nën Presidencën e Portugalisë dhe tani sytë janë drejtuar tek Sllovenia, e cila pritet të marrë drejtimin e Presidencës së Bashkimit Evropian.

Sa i takon Shqipërisë, të gjitha vendet e unionit ishin “pro” mbajtjes së Konferencës së Parë Ndërqeveritare, përfshirë këtu edhe vendet më skeptike siç ishte Holanda, por mosmarrëveshjet e krijuara mes Bullgarisë dhe Maqedonisë së Veriut frenuan qartazi përpjekjet e vendit tonë që të hapte një kapitull të ri në rrugën e anëtarësimit në Bashkimin Evropian.

LEXONI GJITHASHTU:

• S’ka datë për negociatat, vetoja e Bullgarisë për RMV bllokon edhe Shqipërinë
• Negociatat, ambasadori Soreca flet për Euronews Albania: Hera e parë që të gjithë janë pro Shqipërisë, shansi tjetër në tetor