“Nuk marrim leje nga askush”- Khamenei sinjalizon dështimin e negociatave me SHBA-të

Udhëheqësi Suprem i Iranit, Ajatollah Ali Khamenei, ka hedhur poshtë çdo shpresë për një përparim në negociatat me Shtetet e Bashkuara mbi programin bërthamor të Teheranit, duke i quajtur përpjekjet aktuale “të kota” dhe duke akuzuar administratën amerikane për dështimin.

Në një deklaratë të transmetuar nga televizioni shtetëror iranian, Khamenei tha se nuk pret që bisedimet, qoftë edhe ato indirekte, të çojnë në ndonjë marrëveshje konkrete. Ai kujtoi se edhe gjatë presidencës së të ndjerit Ebrahim Raisi kishte pasur negociata, por “pa asnjë rezultat”.

“Nuk e dimë se çfarë do të ndodhë, por nuk kemi pritshmëri për sukses,” u shpreh Khamenei.

Komentet e tij vijnë në një moment të tensionuar në marrëdhëniet SHBA-Iran dhe kanë shtuar pasigurinë mbi të ardhmen e një marrëveshjeje të mundshme për heqjen e sanksioneve amerikane në këmbim të kufizimeve në programin atomik të Iranit. Si pasojë, çmimet e naftës Brent u rritën, pasi tregjet reaguan ndaj mundësisë së largimit të një furnizuesi kyç si Irani nga tregu global i energjisë.

Khamenei gjithashtu e cilësoi “skandaloze” kërkesën e Uashingtonit për çmontimin e programit iranian të pasurimit të uraniumit, një pikë që ka mbetur thelbësore në çdo raund bisedimesh.

“Republika Islamike nuk merr leje nga askush. Ne kemi politikat tona, qasjen tonë dhe ndjekim rrugën tonë,” tha Khamenei me tone sfiduese.

Si autoriteti më i lartë politik dhe fetar në Iran, fjalët e Khameneit sinjalizojnë qartë se vendi nuk është i gatshëm të lëshojë terren në çështjen bërthamore, duke vënë në pikëpyetje çdo përpjekje për rikthim në një marrëveshje si ajo e vitit 2015 (JCPOA), nga e cila SHBA u tërhoq në vitin 2018.

LEXONI GJITHASHTU:

• Telefonata Trump-Putin: Në fokus fundi i gjakderdhjes në Ukrainë
• Macron thirrje Trumpit nga Tirana: Duhet presion ndaj Putinit, po tregohet cinik