“Numrat në fletën e votimit lehtësojnë manipulimin”, Premto Gogo analizon kundërshtitë për fletën e votimit

Premto Gogo, kryetari i Koalicionit për Reforma, Integrim dhe Institucione të Konsoliduara  tha se kundërshtitë për fletën e votimit janë shenja jo të mira dhe shqetësuese.

“Në fakt, gjithë diskutimi është një diskutim, në këndvështrimin tonë, i cili ka harxhuar energji dhe çon në këtë lloj dështimi që thamë duke evidentuar dhe vendimmarrjen e dytë të paligjshme të KAS-it,” – u shpreh Gogo.

Sipas tij vendimi i marrë në shqyrtimin e KAS është një diskrecion i tepruar i Komisionit të Apelimit dhe Sanksioneve. Gogo theksoi se ky diskrecion do të vlerësohej në momentin që shqyrtohej çështja ndaj eksponentëve të mazhorancës, për përdorimin e burimeve shtetërore.

Kryetari i Koalicionit për Reforma, Integrim dhe Institucione të Konsoliduara sqaroi në Euronews Albania, se në disa nene të Kodit Zgjedhor parashikohet vendosja e emrit të kandidatit dhe fakti që i njëjti numër nuk i referohet në mënyrë shteruese të njëjtit emër, në të gjithë procesin zgjedhor është shqetësuese.

“Nuk e kemi të rregulluar këtë pjesë se si do të informohet se kush janë këta numra,” –  u shpreh ai.

Në këndvështrimin e Gogos fakti që opozita nuk luftoi për këtë të drejtë që forcon qytetarët është për të ardhur keq.

Komisioneri Shtetëror i Zgjedhjeve, sipas Gogos, mbase është vonuar në qasjen e tij për të gjetur dakordësi politike mbi fletën e votimit dhe Komisioni Rregullator hoqi dorë nga kompetenca e vet, pikërisht prej presionit të madh politik.

Pse është ky presion i madh politik që të jetë me numra? – ishte pyetja që ngriti Gogo, i cili theksoi se pavarësisht mbrojtjes që bëri opozita, ishte një mënyrë që i shkoi për shtat.

Teksa analizoi se Kodi dhe Kushtetuta flasin për emra e jo për numra, ai theksoi se printimi i fletave të votimit në kohë është një tjetër rrezik.