Numrat rekord të fitores së Vetëvendosjes

Lëvizja Vetëvendosje fitoi zgjedhjet e Kosovës me rezultate rekord që prej çlirimit të vendit nga sundimi serb. Në emisionin “Me Pak Fjalë” u shpjeguan zgjedhjet që u mbajtën të dielën në Kosovë duke ilustruar me anë të shifrave.

Zgjedhjet e 14 shkurtit ishin të parakohshme. Vetëm 16 muaj më parë Kosova mbajti zgjedhje, në Tetor 2019, të cilat i fitoi gjithashtu LVV.

Ndonëse ende janë pa u numëruar votat e diasporës, votat me kusht dhe votat e personave me nevoja të veçanta, Lëvizja Vetëvendosje ka marrë rreth 48% të votave, më shumë se çdo parti në historinë e Kosovës.

Janë rreth 377 mijë qytetarë që kanë votuar LVV-në, shifër e cila thyen rekordin e mëparshëm të votave të fituara nga ish-presidenti Ibrahim Rugova në vitin 2001, i cili mori atëherë rreth 359 mijë vota.

Krahasuar me 16 muaj më parë, LVV-ja ka marrë 70% më shumë vota, ose 156 mijë vota më shumë. Kjo është gjithashtu rritje rekord e një partie nga një zgjedhje në tjetrën.

Me rezultatet aktuale të zgjedhjeve, LVV ka siguruar 55 mandate në Kuvendin me 120 vende të Kosovës. Ky është numri më i lartë që ka marrë ndonjëherë një parti.

Vetëvendosjes i mjafton një marrëveshje me një nga partitë e minoriteteve për të siguruar 6 mandate të tjera që i duhen për të votuar qeverinë. Kjo do të thotë se për herë të parë në historinë e Kosovës pas çlirimit nga Serbia, asnjë nga dy partitë historike, LDK ose PDK, nuk do të jetë në qeveri.

Lëvizja Vetëvendosje mori pjesë në zgjedhjet e Kosovës për herë të parë në vitin 2010. Në një dekadë ajo pothuajse ka 5-fishuar numrin e votuesve dhe të deputetëve në parlament.