Numri i rasteve aktive me COVID-19 në Kosovë bie nën 6 mijë persona

Gjashtë viktima dhe mbi 200 raste të reja janë regjistruar në Kosovë gjatë 24 orëve të fundit. Bëhet fjalë për kryerjen e 1 281 testeve ku të infektuar rezultuan 206 persona.

Deri tani Kosova numëron 1 383 viktima ndërsa nga kryerja e gati 200 mijë testeve në total që prej fillimit të pandemisë kanë rezultuar të infektuar afërisht 54 mijë persona.

Nga ana tjetër në 24 orët e fundit, janë shëruar 389 pacientë derisa numri i përgjithshëm i të shëruarve deri më sot është gjithsej 46.648 raste, kurse numri i rasteve aktive është 5.951.

Në krahasim me Shqipërinë, Kosova ka më shumë viktima por numri i rasteve aktive është shumë herë më i ulët.

Nga mbi 24 700 raste aktive në Shqipëri, Kosova ka aktualisht më pak se 6 mijë raste, duke lënë të besohet se ndoshta Kosova po del nga vala e dytë e COVID-19.

Deri në fund të vitit 2020, Kosova kishte mbi 8 500 raste aktive dhe gjatë 11 ditëve të para të janarit numri i personave të shëruar ka qenë më i lartë se sa i infektimeve të reja.