Nuredin Dumani dyshohet të jetë përfshirë në një tjetër vrasje në Elbasan

Nuredin Dumani i shpallur në kërkim si autor i dyshuar i vrasjes së Bujar Çelës dyshohet të jetë i përfshirë dhe në ekzekutimin e Emiljano Ramazanit më 20 korrik në Elbasan. Ai dyshohet të ketë marrë pjesë në atentatin mafioz ndaj 39-vjeçarit Ramazani së bashku me mikun e tij Klevis Kapllani.

Ky i fundit u ekzekutua me 15 shtator në fshatin Sinaballaj të Rrogozhinës vetëm pak metra nga banesa e tij. Policia e Shtetit në lidhje me vrasjen e Emiljano Ramazanit ka njoftuar se janë përfshirë Xhuljano Hoxha dhe Egulen Halili.

“Nga hetimet intensive ka rezultuar se këta dy shtetas janë të përfshirë edhe në vrasjen e shtetasit E. R., ndodhur më datë 20 korrik 2020 në qytetin e Elbasanit, pasi nga provat e grumbulluara rezulton se të dy këta shtetas kanë ndjekur dhe kontrolluar lëvizjet e viktimës”, njoftoi policia.

Për Klevis Kapllanin edhe me herët ka patur dyshime se është përfshirë në disa ngjarje kriminale në qytetin e Elbasanit çka solli dhe eleminimin fizik të tij, ndonëse për vrasjen e tij nuk ka asnjë të arrestuar.

Ai njihej si mik i ngushtë i Nuredin Dumanit me të cilin shoqërohej edhe muajt e fundit pavarësisht se ky i fundit ishte në kërkim për ngjarje të tjera kriminale, për të cilat akuzohet se është përfshirë.

Lexoni gjithashtu:

Ekskluzive/ Zbardhet vrasja e vëllait të Talo Çelës

Vritet në një atentat në Elbasan vëllai i të shumëkërkuarit Talo Çela

Ekzekutimi i vëllait të të shumëkërkuarit për grabitjen e Rinasit, gazetari i Euronews Albania sjell detajet